|
Det er laurdag ettermiddag i
Strandgata og det skin i nypussa metall. Mai-himmelen
er stor og blå over kystbyen, og éin etter éin har
motoriserte tohjulingar funne vegen fram – mange kanskje for første
gong i år.
Nervøs
– De må snakke med ho
middelaldrande dama der borte, er det ein som seier til oss.
– Ho fekk sin første
motorsykkel i går. Han peikar bort mot ei
svarthåra dame i like svart køyredress.
Med eit nervøst smil
kring dei kvite tennene følgjer ho oss bort til "Høvdingen".
– Eg har kalla
sykkelen opp etter ein fiskebåt som bestefaren min hadde, seier
ho. Og etter at ho har
tent ein sigarett, legg ho til: – Eg kvir meg som berre
det. Difor har eg kjøpt røyk i dag for første gong på fire
år.
Sanseleg
Fembarnsmor Grethe Amundsen er
tydelegvis ikkje som alle andre mødrer. Ikkje som alle andre
bestemødrer heller. Ho har allereie to barneborn.
– Er den ikkje
fin? spør ho og stryk ein finger over jadegrønt metall.
"Harley Davidson
883 Sportster" står det skrive på bensintanken, og det
skal vere solid nok til å frakte ei kvinne i sin beste alder frå
A til B.
– Eg sneik meg
kring hjørna i 20 kilometer i timen her i går, og brått gav
eg gass. Med eit poff fauk eg av garde. Eg tør ikkje seie kor
fort det gjekk, seier Amundsen alvorleg.
Og så bryt ho ut i
latter.
– Det var ei
sanseleg oppleving, humrar ho fram.
Kvinneleg
Det er berre nokre få minutt
att til tusenvis av kubikk skal samle seg til paradekøyring,
men Amundsen rekk å fortelje korleis ei vaksen dame kan
finansiere jentedraumen sin.
– I alle år
har barnetrygda gått til gummistøvlar og slikt. Framleis har
eg to born under atten år, og i dei næraste fem åra skal
barnetrygda eg får for dei, gå til sykkelen, seier ho og syg i
seg resten av sigaretten.
– Den kosta 132 000,
legg ho til.
Så er det på med
hjelmen og igjen med jakka.
– Eg er ikkje
det spor tøff, så eg er redd eg vert "rævediltaren"
i dag, seier Amundsen.
– Men når eg får
ekstrasete, kan eg ha mora mi bak meg. Ho er 76.
Før ho hiv seg oppå,
gjev ho leppene eit nytt lag med rosa stift. Ho vil ikkje at det
skal bli noko kjønnsskifte på heile greia, som ho seier.
– Men det
viktigaste er Guds vind på kinna – å bli soge inn i Guds
vind, smiler ho – og forsvinn.
HARALD
BRATLAND CARLSEN harald.bratland.carlsen@firda.no
Telefon 57 86 89 20
Det
viktigaste er Guds vind på kinna – å bli soge inn i Guds
vind, smiler ho – og forsvinn.
Foto:
Arne Stubhaug . |
|
