Laurdag startar markeringa av 100-årsjubileet
for den motorsykkelen som opp gjennom åra og
takka vere god marknadsføring er blitt eit
kjenneteikn på The American Way of Life, på
linje med skyskraparane, Elvis, Coca-Cola og
hamburgeren. MC-kulturen er blitt ein livsstil
for mange menneske, og det fremste symbolet på
denne livsstilen er ved Harley-Davidson, ein
brumlebass av ein sykkel som også representerer
kontinuiteten og tradisjonane i MC-miljøa rundt
om i verda.
Religiøst
– Det er ikkje tvil om at merkevara
Harley-Davidson står sterkt. Det er nesten noko
religiøst over det. Når folk tatoverer
Harley-logoen på skuldra, kan vi trygt kalle dei
trufaste kundar, seier Hillersøy.
– Harley Davidson sel ikkje berre syklar, men ei
lang rekkje spin-off produkt. I fjor hadde
fabrikken større omsetnad på deler og utstyr enn
på syklar, seier Hillersøy. I samband med
jubileet lanserer Harley eigne
hundreårsmodellar, og på Båt og MC-senteret i
Florø mottok Hillersøy dei første ordrane for
fleire år sidan.
– Eg veit ikkje om noko anna produkt som folk er
villig til å betale 350 000 kroner for utan ein
gong å ha sett korleis det ser ut, seier
Hillersøy. Og kundane er stort sett godt vaksne
menn med solid inntekt. For ein Harley er ikkje
billeg.
– Du må ut med frå 150 000 kroner og oppover,
seier Hillersøy og set seg omskrevs på ein
sykkel til 282 000.
Familiefedre
– Difor er inntrykket som media har skapt av eit
nokså tvilsamt MC-miljø langt frå
representativt. Det er stort sett familiefedre
som gjennom Harley'en har funne eit miljø, ein
livsstil og ein fristad.
Lyden av Harley-syklane er for mange menneske
den reinaste musikken, og når Harley-Davidson
fyller hundre år, går det heller ikkje stille og
upåakta for seg.
– Vi byrjar pent med å lansere dei nye
modellane, men så går det slag i slag eit år til
ende, med markeringar både i Europa og Amerika,
seier Hillersøy, som reknar med at mange
MC-interesserte frå heile fylket vil stikke
innom for å sjå på dei nye modellane.
– Dei færraste vil kjøpe, men dei fleste kan
drøyme, seier Harley-forhandlaren.
Publisert i Firda:
20.09.2002 |
