|
- Ei av målsetningane til
Florø MC-klubb er å skape ein betre
trafikkultur og eit godt miljø blant MC
ungdommen. Før klubben kom skikkeleg i
gang var det ein del klage og avisskriveri på
og om motorsyklistane i byen. Men i den
seinare tid har vi fått eit godt forhold til
politiet. Det er er også kome ein god del
mindre klager frå publikum takka være klubben og dei som starta den, seier nestformann Morten
Mortensen til FP.
Eit av dei tiltaka dei har
sett i gong er "dugleikskøyring" der
kravet er å rå best mogelig over sykkelen, og
bli sikrare trafikant. Klubben disponerer
eit område bak flyplassen som dei brukar til
dette føremålet.
Det starta i 1973
Det
var i 1973 at Atle Kvellestad og Geir Gåsøy
starta arbeidet med å få i gang ein
motorsykkelklubb i Florø. Geir Gåsøy
driv no forretning og er sjåførlærar i Florø
og Førde, med motorsykkel som spesialitet.
Florø MC-klubb vart offisielt
opna 3. september 1976, påskunda av eit offentleg
møte i gamle Breidarblikk. I starten
hadde klubben kring 20 aktive medlemmer. I
dag har dei passert femti. Nesten ei
tredobling på fire år skulle vise at trongen
er der.
Ikkje røyk og alkohol
MC-klubben har fått leige (gratis) eit lokale
av Olav Sande. Det ligg i kjellaren på
huset der han driv Sande Reisebyrå.
Lokala har medlemmane sjølve rydda og pussa
opp, og dei har fått i stand eit fint og
hyggeleg møterom og verkstad. Der blir
medlemsmøta haldne kvar 14. dag. Om
sommaren er møta meir uoffisielle. I
styret for klubben er: Olav Tveranger,
formann. Morten Mortensen, nestformann og
Dag Knapstad, kasserar.
På klubbkveldane blir det
blant anna synt film om motorsykkel. Det
er ikkje lovleg å røyke eller nyta alkohol på
møta. - røking mest pga. brannfare.
Hovudaktivitetane blir lagt
på å få stelt i stand turar og reise rundt
på MC-treff. På MC-treffa møtast
motorsyklistar frå nær og fjern.
Langturar
Det
har blant anna vore folk
her i frå og ned til middelhavet på
motorsykkelturar, og det har vore representantar
frå Florø MC-klubb i kvart europeisk land der
der dei har kome inn. I desse landa har
dei stort sett vorte godt mottekne.
I Finland, på eit treff som
heiter "Muurat Meeting" , og i Alta
har dei fått premie av di dei har vore den
MC-klubben som har kjørt lengst for å
delta. På MC-treffa er det tautrekking og
tønnerulling som er deira spesialitet.
Lurer på eige hus
- Kva krevst for å
bli medlem? - For det første må ein være fylt
15 år og for det andre må ein ha interesse for
for motorsyklar og sette seg etter reglane
i klubben Eit års medlemskap i MC-klubben
kostar 50 kroner for skuleungdom og 100 for
voksne.
Korleis er økonomien i
klubben?. - Den er stort sett bra, og vi
har i grunnen råd til å kjøpe inn det meste
av det vi har bruk for. Litt kulturell
støtte har vi fått. Ein del av dei
pengane vi får inn på arrangement blir lagt
til side med tanke på å få reist vårt eige
klubbhus av oppsparte pengar, seier Mortensen.
|
